恆之以久...?

回想當初第一次筆者寫blog的時候，
應該已經要回溯到中學時期了。
當期時有一個社交網站，名為Xanga。
每一個夜晚，放完學補完習返到屋企，
通常第一時間就係開著部電腦，
然後就大揮文筆係Xanga上面暢所欲言。
而當自己寫完今日做過乜做過物之後，
就係四圍逛，睇下其他朋友寫左D乜野。

其實到今時今日依家自己諗返起，
個陣日日放學功課都未開始做，
都要第一件事打開部電腦去寫篇文，
真係平時交功課寫作文都無咁叻啦。
點解細細個的時候可以每一日都咁樣，
可以咁恆之以久去每日堅持去update？

細細個的時候，
每一日，都只係返學等放學，放學飲可樂。
成班同學係度圍威喂，HEHE蝦蝦又一日。
細細個的時候，
每一日，上堂就係計劃小息個陣要做D乜，
到底去踢波打波好丫，定係去買野食呢？
每一日，都係輕輕鬆鬆咁渡過，
無咩壓力會係自己身上出現，
好多日常的事情都可以笑一笑就過去了。
(咁當然要考試交功課呢D基本野就唔計啦)
每一日上Xanga交作業，
都只不過係開心share一下自己的每一天。

當個人長大了、開始要投身社會了，
接觸的人同事都一定比讀書時期的多，
但係生活就從此變得不再輕鬆了。
你要擔心，自己返工個陣唔可以出錯；
你要擔心，自己的一言一行都要慎密；
你要擔心，唔知點解有咁多事要擔心。
從而，生活開始變得機械化、變得乏味，
你開始覺得自己無貨去交作業了。
自自然，那一年，大家每天更新過的Blog，
也慢慢地黯然失色了。

中學之後，筆者曾經試過努力去嘗試，
由不同範疇出發去寫下生活的點滴：
從遊戲、生活、讀書、甚至係廢嗡，
可惜都仲未搵到一個出發點可以堅持下去。
今次到底呢一個Blog又可以維持到幾耐呢？
我不多說，就讓我們看下去。
同時係呢度希望各位有寫blog的朋友仔，
一起努力吧！

P.S. 其實筆者真係覺得自己寫作的材料太少
總不想為交貨而交貨，你們懂的

P.S.2. Disney Tsum Tsum真係好得意呀！
今日筆者都忍唔住買了幾隻…好貴呀不過

忍

最近，筆者被各方好友吐出來的苦水，
噴到一臉都係。
而無可否認，只要你生活於現今社會下，
每日喺不同範疇上都避免不了會有磨擦。

“今日呀邊個邊個又點樣又咁樣呀，煩！”
“尋晚見個客囉，又呢樣又個樣呀，煩！”
“放工喺巴士上面呢又阿乜又阿物，煩！”

每當我比呢類型既範例苦水噴完我塊臉，
乾晒之後我都只會用安慰的態度講一句
“忍吓啦，係咁架啦”
呢句貌似平平無奇的簡單句子，
原來會催發出比吐苦水時更憤怒的情緒。
“忍？點忍忍呀！”

到底，一個忍字其實有咩意思呢？

忍 
rěn 
【動】 
(形聲。從心，刃聲。本義：忍耐、容忍) 

古語有云：小不忍則亂大謀；
俗言開講：忍屎忍尿都唔忍(某人/事)

忍，是為人處事的一種態度；
是從自身出發，對外的一種處事手法。
而這種態度，連我都唔知由幾時開始，
已經變成為理所當然要做得到的事。

返工從無遲到只有遲放，超時無糧 - 忍。
對住個客只有無理投訴，無得解釋 - 忍。
巴士旁邊個阿婆剪指甲，彈你一身 - 忍。
喺條街度隨地大小二便，勁唔衛生 - 忍。

那些人那些事，難道就是無錯的嗎？
更可怕的是，現今社會就是因為個忍字，
令到好多本身錯的事物被潛移默化，
轉成為了好正常、好應該的。
當你唔忍，又比人話你厚多士又洋蔥圈。

忍，到底係唔係只有得聖人，
又或者EQ要高到無比膏先可以做得到？
當每個人都想講句點忍忍的時候，
其實已經表達了以自己個人力量，
並不足以改變眼前呢一個
不公平、不合理現象的事實。
與其自己在角落當一個憤青/佬/婆，
何不將自己眼光放鬆一點呢？

老闆要你開OT又唔補水，
你除咗劈砲唔撈之外仲可以點？
唔通一刀劈死佢咩？
強國人喺廣場地鐵街邊痾BI，
咁你只有敬而遠之，廢事踩BI。
難道叫佢吞返去咩？

忍，無可厚非係可以避免不必要的口角，
而通常這種口角都只係口同鼻嘈，
永遠都唔會有一個根治、理性的解決。

不過請各位唔好忘記、亦唔好誤解，
忍，並唔係代表該事該人一定就是正確。
言而係當你獨力不能將當中錯誤改正時，
忍。笑住同自己講一句，
習慣就好。
因為處事而言，換轉角度，
正所謂已所不欲勿施於人，
你都會有機會做緊無理取鬧嗰一位。
你唔忍，佢唔忍，大家都唔忍的話，
我諗全世界作為媽媽輩的，
每日會增添不少專門去探訪問候的好友。

放鬆啲啦！
呢個世界呢個社會無可能做到事事公平。
每個人每一日生活，都有自己的角色。
返工，你可能係老闆可能係員工。
屋企，你可能係父母可能係仔女。
出街，你可能係路人可能係消費者。
叫你點忍忍，無非只係為咗減少磨擦。
當你對得人事物多，自自然，
忍，只不過係經理經理，經過唔理。
忍，人長大了見識多了，自然學會。

唔好咁厚多士啦…