久別的母校。
由小學開始，曾經喺籃球場跪爛過幾多條校褲、膝頭流過幾多血，已經不能盡數。曾經喺足球場成大半班人廿幾三十個人追一個波、每人兩個頭食過幾個波餅亦然。
自從離開母校後，屈指一算，八年了。昔日那破爛的石屎籃球場已不再存在，那個熱鬧的氣氛也緊隨而去；那個足球場也變得更舒適高檔次了，人丁卻變得單薄了。
今日難得重回母校的感覺很好。雖然因為自己不會守龍門而輸了一場舊生足球比賽（萬分抱歉…），但多得友人支持，勝負對大家來說已經不再重要。輸了球賽，贏得了各位舊同學之間的那份凝聚力。球賽完了，一個人留在籃球場射畢一百球罰球再離開，發現原來環境怎變，心不會變。
人在變、事在變、物也在變，每分每秒毫不間止。我說的不只是母校的好朋友，也包括身邊各位的你妳您。當剩下的只有那份熱情、態度，希望各友人可以keep it up, 留住你自己的心不變、凝聚力不變。不然，就會連那剩餘的都變為一無所有。
懶惰，你我都知道是什麼，
你會想敬而遠知，但它卻揮之不去，
尤其是當你已經習慣它存活在你生活裡。
這感覺，說可怕也談不上，
但絕對不是一件好事。
每一日，你都希望公司老闆上司唔喺度，
這樣，做起事上來會無壓力輕鬆些少。
每一日，你都希望會係天有不測之風雲，
自然就會少一些客人，減少自己工作量。
久而久之，當你覺得以上事情理所當然，
惰性已經慢慢地入侵到你的骨子裡。
你會覺得，當有上司老闆看管著辦事，
會整個氣氛變得沉重，辦起事來不順。
你會覺得，當公司生意好了忙了，
會在想薪金固定，工作量卻是苦了自己。
當你習慣了繞著身邊的惰性，
自自然，那個力求上進、事事上心的你，
也隨著時間消逝了。
換來的只剩下得過且過、不思進取的心。
唉。
當說到堅持
筆者也只不過是一個凡人
花花世界太過美
沿途上有著各式各樣的誘惑了。
明明自己可以放假那天早上去運動
卻被睡魔緊緊的抱在床上；
明明可以與家人們聚首一堂吃個飯
卻被各種酒局飯局hea局摧毀了；
明明早已成定局，
卻被自己的幻想世界令自己有所動搖。
唉。
可唔可以定性少少？
少少力都擠不出來的感覺
很爛…
我可能係安於現況；
我可能係不思進取。
但係如果你試掉返轉頭諗，
你自己鐘唔鐘意一味比人罵不還口？
你自己鐘唔鐘意無人理你講乜諗乜？
你自己鐘唔鐘意得人發洩無你發洩？
我都有脾氣，
我都有樽鹽，
我都係凡人…
好，發洩完。
路還是要繼續行，
無論個條路有幾麒麟怪…
最近，筆者被各方好友吐出來的苦水，
噴到一臉都係。
而無可否認，只要你生活於現今社會下，
每日喺不同範疇上都避免不了會有磨擦。
“今日呀邊個邊個又點樣又咁樣呀，煩！”
“尋晚見個客囉，又呢樣又個樣呀，煩！”
“放工喺巴士上面呢又阿乜又阿物，煩！”
每當我比呢類型既範例苦水噴完我塊臉，
乾晒之後我都只會用安慰的態度講一句
“忍吓啦，係咁架啦”
呢句貌似平平無奇的簡單句子，
原來會催發出比吐苦水時更憤怒的情緒。
“忍？點忍忍呀！”
到底，一個忍字其實有咩意思呢？
忍
rěn
【動】
(形聲。從心，刃聲。本義：忍耐、容忍)
古語有云：小不忍則亂大謀；
俗言開講：忍屎忍尿都唔忍(某人/事)
忍，是為人處事的一種態度；
是從自身出發，對外的一種處事手法。
而這種態度，連我都唔知由幾時開始，
已經變成為理所當然要做得到的事。
返工從無遲到只有遲放，超時無糧 - 忍。
對住個客只有無理投訴，無得解釋 - 忍。
巴士旁邊個阿婆剪指甲，彈你一身 - 忍。
喺條街度隨地大小二便，勁唔衛生 - 忍。
那些人那些事，難道就是無錯的嗎？
更可怕的是，現今社會就是因為個忍字，
令到好多本身錯的事物被潛移默化，
轉成為了好正常、好應該的。
當你唔忍，又比人話你厚多士又洋蔥圈。
忍，到底係唔係只有得聖人，
又或者EQ要高到無比膏先可以做得到？
當每個人都想講句點忍忍的時候，
其實已經表達了以自己個人力量，
並不足以改變眼前呢一個
不公平、不合理現象的事實。
與其自己在角落當一個憤青/佬/婆，
何不將自己眼光放鬆一點呢？
老闆要你開OT又唔補水，
你除咗劈砲唔撈之外仲可以點？
唔通一刀劈死佢咩？
強國人喺廣場地鐵街邊痾BI，
咁你只有敬而遠之，廢事踩BI。
難道叫佢吞返去咩？
忍，無可厚非係可以避免不必要的口角，
而通常這種口角都只係口同鼻嘈，
永遠都唔會有一個根治、理性的解決。
不過請各位唔好忘記、亦唔好誤解，
忍，並唔係代表該事該人一定就是正確。
言而係當你獨力不能將當中錯誤改正時，
忍。笑住同自己講一句，
習慣就好。
因為處事而言，換轉角度，
正所謂已所不欲勿施於人，
你都會有機會做緊無理取鬧嗰一位。
你唔忍，佢唔忍，大家都唔忍的話，
我諗全世界作為媽媽輩的，
每日會增添不少專門去探訪問候的好友。
放鬆啲啦！
呢個世界呢個社會無可能做到事事公平。
每個人每一日生活，都有自己的角色。
返工，你可能係老闆可能係員工。
屋企，你可能係父母可能係仔女。
出街，你可能係路人可能係消費者。
叫你點忍忍，無非只係為咗減少磨擦。
當你對得人事物多，自自然，
忍，只不過係經理經理，經過唔理。
忍，人長大了見識多了，自然學會。
唔好咁厚多士啦…
